Kvenréttindafélag Íslands, Mannréttindaskrifstofa Íslands, Samtök um kvennaathvarf og Stígamót hafa í sameiningu skilað viðbótarskýrslu við skýrslu stjórnvalda um framkvæmd Istanbúlssamningsins, samning Evrópuráðsins um forvarnir og baráttu gegn ofbeldi gagnvart konum og heimilisofbeldi.
Istanbúlsamningurinn var samþykktur á vettvangi Evrópuráðsins 11. maí 2011 og undirritaður af íslenskum stjórnvöldum sama dag. Samningurinn var loks fullgiltur þann 26. apríl 2018. Á grundvelli samningsins skila stjórnvöld inn skýrslum um framkvæmd Istanbúlsamningsins hér á Íslandi og var þeirri skýrslu skilað inn í september á þesu ári (lesið skýrslu stjórnvalda hér).
GREVIO nefnd Evrópuráðsins (Group of Experts on Action against Violence against Women and Domestic Violence) hefur það hlutverk að meta framkvæmd stjórnvalda á forvörnum og baráttu gegn ofbeldi gagnvart konum og heimilisofbeldi á Íslandi. Til að aðstoða við þá vinnu hafa Kvenréttindafélag Íslands, Mannréttindaskrifstofa Íslands, Samtök um kvennaathvarf og Stígamót sent til GREVIO viðbót við skýrslu stjórnvalda.
