+354 551-8156 postur@kvenrettindafelag.is

Tatjana Latinovic nýr formaður Kvenréttindafélagsins

Stjórn og framkvæmdastýra Kvenréttindafélags Íslands 2019. Á mynd: Brynhildur Heiðar- og Ómarsdóttir, Steinunn Stefánsdóttir, Ellen Calmon, Tatjana Latinovic, Eva Huld Ívarsdóttir, Helga Baldvins Bjargardóttir, Hjördís Guðný Guðmundsdóttir, Stefanía Sigurðardóttir, Bergljót Tulinius Gunnlaugsdóttir, Helga Dögg Björgvinsdóttir og Hildur Helga Gísladóttir.

Tatjana Latinovic var kjörin nýr formaður Kvenréttindafélags Íslands á aðalfundi félagsins í gær, 6. maí 2019.

Tatjana er fyrsti formaður Kvenréttindafélagsins af erlendum uppruna, en félagið var stofnað af Bríeti Bjarnhéðinsdóttur árið 1907.

„Kvenréttindafélag Íslands á sér 112 langa sögu í baráttu fyrir jafnrétti. Ég er stolt að fá tækifæri til að feta í fótspor kvenna sem hafa gegnt formennsku á undan mér og hlakka til að leggja mitt að mörkum að leiða það í áframhaldandi baráttu fyrir jafnrétti fyrir alla,“ sagði Tatjana í ávarpi til fundargesta á aðalfundi.

Tatjana Latinovic hefur setið í stjórn Kvenréttindafélagsins síðan 2015 og gegnt embætti varaformanns síðan þá. Hún hefur verið baráttukona fyrir kvenréttindum og réttindum innflytjenda síðan hún flutti til Íslands árið 1994. Hún er einn stofnenda W.O.M.E.N. in Iceland – Samtaka kvenna af erlendum uppruna, og sat í stjórn frá stofnári 2003 til 2012, þar af sem formaður 2004-2008. Hún sat einnig í stjórn Kvennaathvarfsins, frá 2004 til 2012. Tatjana er formaður Innflytjendaráðs og situr í Jafnréttisráði fyrir hönd Kvenréttindafélagsins.

Fríða Rós Valdimarsdóttir lét af formennsku eftir fjögur ár og átta ára stjórnarsetu. Kvenréttindafélagið þakkar Fríðu fyrir samstarf sitt og ómetanlegt framlag hennar til félagsins og baráttumála þess og hlakkar til áframhaldandi samstarfs við hana á öðrum vettvangi.

Á fundinum voru fimm nýjar konur kosnar í stjórn, Bergljót Tulinius Gunnlaugsdóttir, Eva Huld Ívarsdóttir, Stefanía Sigurðardóttir, Helga Baldvins Bjargardóttir og Hjördís Guðný Guðmundsdóttir. Taka þær sæti í stjórn Kvenréttindafélagsins þar sem áfram sitja Ellen Calmon, Helga Dögg Björgvinsdóttir, Hildur Helga Gísladóttir og Steinunn Stefánsdóttir.

Úr stjórn viku Dagný Ósk Aradóttir Pind, Katrín Júlíusdóttir, Sunna Gunnars Marteinsdóttir og Vilborg Ólafsdóttir, Kvenréttindafélag Íslands þakkar þeim einnig fyrir samstarfið.

Komdu í Kvenréttindafélagið!

Félagaskráning - Popp

Stuðningur þinn skiptir máli!

Kvenréttindafélag Íslands hefur staðið vörð 
um réttindi kvenna á Íslandi síðan 1907. 
 
Félagsgjöld eru 4.000 kr. á ári.